ASHA: स्पर्धा

स्पर्धा

जिंकायची लत लागली की-

मनात एकच स्मशान शांतता पसरते।
हार पचवणे असाध्य रोगासारखे वाटू लागते।
बोलायचे बरेच असते अन् सुचत काहीच नसते।
आपलेच उत्कृष्ट हा आत्मविश्वासही ढासळून जातो।
आपल्यापेक्षा दुसऱ्याला सरस म्हणताना जीभ चाचरते।
अपेक्षांचे ओझे उपेक्षांनी घेतल्यासारखे जाणवू लागते।
दुसऱ्याच्या गाली हसू अन् आपल्या मात्र नयनी अश्रू लपत नसते।
स्पर्धेसाठीच्या विषयाची निवड चुकल्यासारखी जाणवू लागते।
जीवतोड केलेल्या मेहनतीचे पंख छाटल्यासारखे वाटू लागते।
टाळीचा आवाज अन् दुसऱ्याच्या विजयाचा जयघोष मनावर तलवारीचे घाव घालतो।
शरीरात ताप फणफणल्यासारखा अन् पाऊल जड वाटू लागतो।
सुसाट धावणाऱ्या एखाद्या एक्सप्रेसला अचानक शेवटचा थांबा मिळून जातो।
असे असते तर तसे झाले असते अन् तसे असते तर असे झाले असते- अशा भविष्यवाणीने काहूर माजते।
काय चुकलं? का चुकलं? कसं चुकलं? शोधात मन भराऱ्या घेते।
स्पर्धा नक्की कोणाशी? स्वतः तल्या स्पर्धकाशी की ढासळलेल्या आत्मविश्वासाशी? हेच कळत नसते...

क्षण
तालुकास्तरीय अध्यक्ष चषक स्पर्धा